قصائد بدر بن عبدالمحسن – البدر
مجموعة من قصائد الشاعر الكبير الامير / بدر بن عبدالمحسن (الله يرحمه)
ثقلت خطاي
ثقلت خطاي وكن الايام فوقي
صخر الجبال وتحتي الريح والعج
لا والله الا صار ما ارجيه عوقي
غير الذي عن طلبته ما تحرج
يا الله يا مضوي السما بالبروقي
ويا مخرج وبل السحابه من اللج
تمطرني برحمتك وتفك عوقي
وتجعل لي من الضيقات والهم مخرج
أنا مثل حر تخاطف سبوقي
يد العمر والياس والحظ الاعرج
كم غارة صاليت وافتك نوقي
وكم طعنه عانيت من غير ما احتج
وياما رفيت من الليالي فتوقي
وياما عطيت وللعطا كنت الاحوج
مرحوم يا من شيمته في عروقي
دم وفي فكري سجاياه منهج
مشيت دربك لين وقف خفوقي
من التعب مبعدك يا الفجر الابلج
البتول
كل أرض تشيلك ياثقيل الحمول
وكل وقت كريم بالرضا والزعل
وين مارحت تلقى لك حبيب وعذول
وين ماكنت تلقى مثل ياسك أمل
ياطريق الترجي والوله والنحول
والله إني مشيتك لين حد الثمل
لا تظن المسافر من يسوق الرحول
من وقف دون حلمه عاجز ما رحل
وما لمخلوق منجا في الحذر والجفول
ماتصيب السهام ولا يطيش الأجل
الليالي خوات مير منهي البتول
والحوادث عشاير مير وين الفحل
اتذكر في عين الشمس طفل خجول
شالته في هدبها وقت لين اشتعل
أعجب الناس وهجه بالجدل والفضول
مادروا عن جمال الجرح لين إندمل
إن لثمت الزهور وصاحبتني الحقول
ماهقيت إن صافي الشهد عيب النحل
إن تعبنا نحب ولا لقينا قبول
ماتسر الأماني ولا يفيد العذل
مابقى في ضلوعي كود ريح معمول
وثوب شاش عليه من الندامه وحل
لكن الله كريم وكل هم يزول
ماعلى الله بعيد ولو جفاك المحل
الاربعين
ادري ان الوقت يذهب ما يعود
اربعينٍ فارقتني يالعنود
ماطر الايام من غيم الزمان
ما يبل الريق لو مهما يجود
كم شربته صافيٍ بارد قراح
ما دريت ان الظما سر الوجود
كل شمسٍ تلمس اشجار العمر
تحرق الاوراق وتجف الفنود
وكل ريحٍ تدفع شراع العمر
ينقطع به حبل ويميل العمود
اربعين مرت وتوني صغير
انتظر لعل تصدق لي الوعود
والغريب اني على هذا مغبوط
ادري اني بخير لا شفت الحسود
الزمن يا بنيتي كله زوال
ما تخلد كود لحظات السجود
مناكيف
في دربكم ياراحلين مناكيف
تالي ليالي القيظ واول خريفه
ردو سلام اهل القلوب المواليف
على الوليف اللي نشد عن وليفه
ردوه لعذوق النخيل المهانيف
وعلى القصور اللي بوادي حنيفه
دار لها بالقلب عشق وتكاليف
ياعل عين ماهوتها كفيفه
طبنا وشبنا واتعبتنا المشاريف
والمرقب العالي هبوبه عنيفه
ياواردين العد كفو المذاريف
اللي بقى دمع هماج ذريفه
والله لودمي يغيث الملاهيف
قطعت عرقه لين يصفي نزيفه