قصيدة لا كبر همك بصدرك طقها نومه للشاعر عوض خيران
لا كبر همك بصدرك طقها نومه
مجاهدة نفس لين الله ييسرها
مير البلا نومة ماعقبها قومه
مكاسب النفس ماغطت خسايرها
وكل ادمي يقنعه رزقه ومقسومه
وانت وشطارتك صغرها وكبرها
ويا طير لا طرت خذلك في السماء حومه
وعطني علومك من أولها لآخرها
وان ضاق فيك الفضاء واونستلك غومه
قم بالمهمة وصعدها وحدرها
وعوّد وفي ذمتي ما يلحقك لومه
لا تضيع وسط التهالك وانت خابرها
واكتم علومك عن اللي شح بعلومه
لا مضحك(ن) النفوس ولا مكدرها
والا الشهامة براعيها ومرسومة
ماهي عفون تغرك في مظاهرها
وان كان للانذال مشتومة ومذمومة
اهل الجمالة حشا لله ما انكرها
اذا اونست نفسي من الضيقات مزحومة
ازبن رجال تقدرني واقدرها
ازبن طحاطيح ما ازبن لي على بومة
علاج نفسي ليا هاجت مشاعرها
ولا يلتزم لي بحملي غير زيزومة
ليا زاد سعر البضاعة عند تاجرها
لأنه زبون لها ويزيد بالسومة
وامر السماوي مدبرها مدبرها
الشاعر / عوض خيران الرشيدي