قصيدة تدري وش اللي ما تجي بالملايين
قصيدة تدري وش اللي ما تجي بالملايين للشاعر / صالح محسن العروي الجهني
اسمع كلامي زين واستذكره زين
اهجر ذلول النفس واقصر رسنها
انت ادمي مالله خلق لك جناحين
لاضاقت الديره تنحيت عنها
ما فاز بالدنيا يقع راعي الدين
عساك يا اللي تسمع القول منها
اهديك نور العين يا قرت العين
اعمارنا ما عندنا اللي ضمنها
نطمع نبي نبني قصور وبساتين
ونروح ماندري من اللي سكنها
تدري وش اللي ما تجي بالملايين
العافيه لا صرت محروم منها
وتدري وش اللي حدها حد سكين
الحاجه اللي مانت قاوي ثمنها
وتدري وش اللي ما توفي لها الدين
اللي غذاك بصغر سنك لبنها
وتدري وش اللي راجحه بالموازين
سجدة سحر لا ناموا الناس عنها
تدري وش اللي ما يهاب السلاطين
لا زارها غطو عليها كفنها
وتدري من اللي يطعنون المقفين
سود القلوب اللي توقد ضغنها
يغنيك عن رفقة ضعوف ومساكين
سجة قدم بديار ماحدٍ سكنها
ويغنيك من نضم القواصيد بيتين
تازن معانيها وتحسن لحنها
كم شاعر ولف قصيد ودواوين
ليته قبل يتعب عليها خزنها
واخر سؤال وجاوبوا يا مسلمين
امة محمد كيف يسلب وطنها
تدري متى نقدر نحرر فلسطين
لا عادة الامه لماضي زمنها