خاطري ماهو بطيب ولا مرتاح بال – كلمات فيصل الجنيبي

الغياب اللي تمثنى واخذ حلو الوصال
ماحسب لجروحي الدامية وفتوقها
ماعطى لأحلام عمري بعد غابوا مجال
حطم احلامي بعدهم وحطم شوقها
آه ليت الموت ما مر سمحين القبال
كان الاحزان البليغة سلمت طروقها
وآه ليت الموت ما اياخذ زحول الرجال
كان ماهدت عيال الرخوم سبوقها
خاطري ماهو بطيب ولا مرتاح بال
والعرب ماعاد لي شف في منطوقها
اتظاهر بالسعادة وأقول الحال عال
وإلا أنا ضايق والاخلاق طايح سوقها
كل ما اذكر حزة العصر يوم الظل مال
يوم ساعات المفارق تلوح بروقها
كن ماحولي من الناس ناس ولا تزال
عايشه في الأرض هذه وتمشي فوقها
وجد حالي ليت لا قلت للماضي تعال
يرجع الماضي والأيام يرجع ذوقها

كلمات / فيصل الجنيبي